本文重點
話咁快又到農曆新年，城中名人紛紛外遊，卓妮前日（十日）下午就撞到新鴻基地產副主席郭炳江（Thomas）喺五個保鏢護送下，同擔任新地主席嘅媽咪鄺肖卿搭飛機外遊散心。Thomas出名孝順，見佢一手拎護照、一手拖住旅行篋，仲幫媽咪攞埋個ＬＶ旅行袋，由辦理登機手續到入閘都一手包辦，關懷備至，讓郭老太輕鬆挽住手袋登上飛機。
其實唔單止Thomas係孝順仔，大仔郭炳湘聞說都好孝順。記得去年兩會期間，郭炳湘就透露暑假會同郭老太去旅行避暑，但去邊度就無講，最後係咪去得成都唔知道。今次Thomas同郭老太去旅行唔見郭炳湘與太太李天穎（Wendy）隨行，卓妮聽聞郭炳湘近排工作好忙，經常要坐飛機周圍去，至於有乜新動向就仲未收到風嘞！
營商秘訣傳中大生
講番Thomas，佢作為虔誠基督徒唔止有善心，而且好關心青年人發展，最近佢就應經濟動力立法會議員林健鋒邀請，喺灣仔新鴻基中心大本營同三十多名中文大學學生會面，暢談營商之道與人生經驗。喺地產界打滾三十多年嘅Thomas話，佢嘅營商成功秘訣係作出每項商業決定前，要從宏觀環境及微觀角度去分析，宏觀方面要睇地點、時機等，微觀就要睇供求定律。
不過，隨着經驗不斷累積，Thomas逐漸體會到「人」嘅因素非常重要，佢話：「最初確信地點係成功要素，其後漸漸發現時機都好重要，但到咗今日，我深信人與團隊先至係成功關鍵，我哋必須要有一隊合適嘅團隊，組員間能互相產生化學作用，項目才能按計劃地圓滿完成。」Thomas咁注重人才同團隊精神，唔怪得新地搞得咁成功啦！
卓妮