立法會議員早前批評向政府提供青年政策建議嘅青年事務委員會老化，五十個委員之中只得三人係八十後，擔心委員會未能真正反映青年人心聲。委員會主席陳振彬（Bunny）尋日就為老化現象解畫，佢話嗰三個八十後嘅委員已經全部入咗同青年人直接接觸嘅國際交流及會議工作小組，等委員會可以隨時知道青年人最新動向。
Bunny解釋，委員會仲有另外三個工作小組嘅主事人都唔後生，因為呢啲工作小組係關於撥款申請、調查研究同國民教育，小組成員主要係專業人士同學者，要有一定歷練同人生經驗，另外仲有青年制服團隊嘅領袖，呢班人雖然唔係十八、廿二，但委員會會定時會見唔同青年組織聽取意見，所以唔怕有代溝。
講開八十後，近日因圍堵立法會事件，令外界將八十後標籤為激進一群。Bunny認為，香港人一向尊重各方面訴求，之不過佢覺得表達訴求時最重要係有規有矩，要識得互相尊重先可以講自由喎。