前自由黨副主席莎姐周梁淑怡話過要離開政壇，果然講到做到，早幾日仲見佢同其他靚太一齊出席化妝品Clarins嘅一項美白產品推廣活動，睇嚟真係好有決心唔再做政治人。講返莎姐嘅皮膚，底子同質素都相當好，近睇膚色均勻，毛孔又唔大，不過佢就話自己平時都無咩點打理，亦無搽啲咩產品，只係做一般清潔護理程序。
莎姐今年同老公周明權昂然踏入第四十一個結婚年頭，上年佢哋慶祝結婚四十周年紅寶石婚，舉行盛大慶祝會，今年嘅結婚周年紀念，莎姐話老公咁啱出咗門，加上上年都慶祝咗，所以今年就無咩特別大搞，佢仲話兩個女當年都係一月新娘，三母女果然有緣分，難怪感情咁好。
近日流感嚴重，莎姐話佢都中咗招，估計應該係同啲孫交叉感染所致，佢話已經打咗流感針，不過就冇打針預防豬流感，佢呢幾日都要同啲孫保持距離，只敢遠觀，唔敢近玩，免得又再畀機會啲病毒傳來傳去。