鬍鬚曾話，佢覺得用「派糖」一詞唔夠謙，而且一講到「派糖」，市民就會集中討論有糖定冇糖呢個問題，而每項措施總會有人受惠唔到，所以推出紓困措施同時衍生「Ｎ無」問題，即推五項措施社會就出現「五無」人士，推七項措施就有「七無」喎。鬍鬚曾施政失當搞到民怨四起，但佢依家好似講到民怨係源於弱勢社群要求多，呢招偷換概念難道要為嚟緊預算案再次漠視「Ｎ無」人士打定底？

暗示「三無、五無」可避免

佢又話，「派糖」語意不清，市民會將有關措施理解成一種利益輸送，搞到人人喺受惠與否問題上打轉，結果未能受惠嘅市民會忿忿不平，取得好處嘅市民就認為自己應該得到更多。佢講咁多，無非係想話畀大家知社會政策難以做到面面俱圓，暗示社會出現「三無」（無交稅、無住公屋、無申領綜援）、「五無」（三無外另加無電費減免和無差餉）係可避免，之後仲自我感覺良好，力陳過去兩份預算案有乜利民紓困措施得到國際貨幣基金認同。

鬍鬚曾將生活於水深火熱，連開飯、住屋都成問題嘅「三無」、「五無」人士上綱上線說成「Ｎ無」，搞到公眾有一個印象係呢班人貪得無厭，政府無論推幾多惠民德政都滿足唔到。事實上，鬍鬚曾去年針對金融海嘯推出一百六十八億元紓困措施中，中產受惠於薪俸稅及個人入息稅退稅額；公屋住戶免租兩個月；申領綜援嘅就出雙糧……林林總總共十八項措施，「三無、五無」人士卻一啲都受惠唔到。

猶記得上年預算案嘅記招上被記者問到點解冇惠及「三無」人士嘅措施時，即時黑面反問記者「有何提議」，如果連一個前線記者都可以即時答到呢個難題，咁香港仲要呢位財爺做乜？不過睇鬍鬚曾網誌中推卸責任嘅口脗，反屈弱勢社群要求多嘅態度，都知道佢其實無心解決呢個棘手問題。

唔派糖，咁放水囉，放水就夠晒均勻，可以人人受惠嘞，只不過佢無論係派糖同放水，都冇設身處地去理解市民嘅感受，咁佢話派乜都冇用喇。