本文重點
鍾意shopping唔係女人嘅專利，東華三院主席李三元（John）一樣有鋪購物癮，尤其是同佢有情意結嘅卡地亞，佢耐唔耐就要入佢哋舖頭轉個圈，睇吓有咩啱心水，總之「唔買都睇吓啦喂！」
定時定候要朝聖
John鍾情卡地亞原來有段古，話說當年佢喺美國讀書，當時卡地亞手錶極之盛行，搞到John心思思，卒之喺大學最尾嗰年，John忍唔住用獎學金買咗佢人生第一隻卡地亞手錶，點之唔買猶自可，一買就愛上咗，依家定時定候，John都要入去卡地亞朝聖，睇吓有咩新貨到，但係佢就好少同太太一齊行掃貨，事關心頭好呢啲嘢每個人嘅睇法都有唔同，所以shopping都係自己一個人行會自由自在啲。
不過咁，佢雖然唔同太太行街，但就搵咗個好朋友陪住老婆，呢個咁肯捱義氣嘅朋友叫做「茄薯」，John咁識做，唔怪之得李太無投訴啦！
早前李主席出席活動，就戴咗卡地亞嘅Tank Basculante鋼錶，呢隻錶好特別，錶肉可以翻出嚟轉180度，變成一條手鏈，大概要三萬幾蚊先有交易，不過隻錶已經停產。
卓妮