Kenneth愛賽馬嘅程度比父親有過之而無不及，除個人擁有「好知己」及新馬「中環英雄」外，仲有三匹團體馬。卓妮尋日喺沙田馬場撞見Kenneth。「中環英雄」初上陣未見成績，相反團體馬「好日子」就勝出頭馬，馬主捧走逾百三萬獎金。

Kenneth笑逐顏開大談養馬經，自爆幾年前購入「好日子」時身價只係八十萬元，估唔到特訓一輪後變身千里馬。發掘駿馬考眼光又講運氣。

Kenneth話，部分香港馬主無乜耐性，寧願花幾百萬購入一級靚馬，佢份人有耐性，會喺BB馬堆中發掘中價潛質馬。上周跟隨一眾馬主去新西蘭尋寶，一次過扑錘購入八隻之多，交由當地練馬師操練兩、三年先出賽。計計數，他日其中一隻良駒唔覺意進身為馬王，咁就發達囉。

劉業強喺新西蘭買馬，會放長線喺當地訓練兩、三年。 （資料圖片）

「好日子」奪冠，劉業強（中）同林建康（左）雙雙拉頭馬。

發叔：佢鍾意，我出啲囉

Kenneth話養馬旨在考眼光，並非追求巨額回報，皆因發叔教落，養馬只為怡情，就算用幾百萬買匹馬返嚟，都只會當成閒暇興趣：「千祈唔好諗住當做投資，好運就話賺到啫，唔好運呀，盞倒錢出去！」

多年來發叔只養過四匹愛駒，已經全部退役。卓妮問佢有冇「揼水」支持囝囝買新馬？佢答得好妙話：「兩父子，講乜嘢支持唔支持吖，佢鍾意，我出啲囉！」發叔錫囝囝，又一例證嘞。

卓妮