最近好旺女高官，不過唔係好嘢，而係忙補鑊，好似反高鐵事件反映政府有關部門同年輕人溝通嚴重不足，運輸及房屋局局長鄭汝樺今朝就會搞網上論壇，喺社區網站facebook同網民交換意見；上周馬頭圍道塌樓造成人命傷亡，結果燒到發展局局長林鄭月娥嗰瓣，娥姐今日起一連四個周末會喺電台主持烽煙節目，直接聽市民對社區重建嘅意見。
雖然終於有局長意識到要補鑊，但主責了解民情嘅民政事務局就似乎懶懶閒，尋日立法會民政事務委員會開會討論青少年發展政策，民建聯議員陳克勤老實不客氣問：連民政事務局副局長許曉暉都有用facebook，唔知身為局長嘅曾德成可唔可以開番個facebook戶口，等大家有機會喺網上溝通吓呢？點知曾德成回應話，自己連同議員溝通嘅時間都唔夠，所以要再諗吓先喎，言下之意即係唔肯開。
依家潮流興facebook，連女高官都要開番個戶口拉近與市民距離，睇嚟曾德成都應該update吓自己至得囉。