泛民主派「五區總辭」帶來好多後遺症，除咗搞補選被指浪費公帑外，仲拖累立法會足球隊前路茫茫。自從社民連兩名「波牛」議員陳偉業同梁國雄執包袱離開立法會後，就少咗人踢波，由於賽例規定要有六個議員落場才可以立法會之名出戰，湊唔夠數就只好取消賽事，就係因為咁，上月底同大律師公會場友誼賽就取消咗，而下月六日同駐港總領事場友誼賽亦好大機會要取消。
不過，立法會足球隊領隊譚偉豪對少兩個議員踢波不以為然，聲言「一雞死一雞鳴」，話目前議會仲有好多波友，只係下月場波因為好多議員唔喺香港，可能被迫取消，但秘書處尋日仍盡最後努力，邀請有興趣嘅議員報名參加。其實有咁多男議員，搵六個落場絕非難事，可惜好多議員都對踢波唔熱衷，結果踢嚟踢去都係嗰幾隻波腳，仲要嚴重老化兼慣性放飛機，睇嚟靠外援贏波嘅宿命都難改變嘞！