前中大校長高錕用一條光纖線接通全世界，咁偉大嘅發明，令不少香港人都感到與有榮焉，更何況係佢母校聖若瑟書院嘅校友呢！返咗嚟香港嘅高錕同太太，聽日（周日）會出席聖若瑟書院一百三十五周年校慶紀念活動，一眾香港名人校友都會出席支持。
身為母校信託基金會員嘅林健鋒（Jeffrey）前日啟程去日本出席關於港日經濟合作會議，本來打算喺日本留多日，星期日先返香港，不過難得高錕重返母校，所以佢寧願提前喺今日返港，以趕及今日與高錕一聚。
師兄要支持，後輩亦一樣要提攜，由佢哋經濟動力搞嘅「Meet the Entrepreneurs」，嚟緊又請到勁人同班學生哥分享營商之道，今次呢位商界猛人就係新鴻基地產副主席郭炳江。Jeffrey話好感激每位嘉賓都好肯抽時間同學生分享，好似上次小超人李澤鉅咁，本來打算同學生傾個半鐘，結果超時傾咗兩個鐘，搞到小超人啲員工排排坐，不過佢哋唔係聽演講，而係攞定file等小超人開會，認真唔話得！