本文重點
廣深港高鐵撥款通過後，擔當政府與菜園村村民之間溝通橋樑嘅鄉議局主席劉皇發，總算暫時鬆一鬆，但可惜一波未平、一「波」又起。天文台計劃喺屯門大欖角興建一座球形新天氣雷達站，為機場探測風切變，以確保航空交通安全，但遭附近大欖涌村居民以風水及健康為由強烈反對，所以政府又要請發叔出面調停。
村民憂雷達站破壞風水
大欖涌村村民主要擔心，雷達站建於天后廟位處嘅山頂，等於要天后娘娘頭上頂住個波，加上雷達站建於村內「青龍位」，嚴重影響風水之餘，發出嘅輻射亦危害健康。天文台早前已讓步降低雷達站高度，但村民仍堅決反對，負責嘅商務及經濟發展局官員尋日就請發叔出面游說村民，但村民始終企硬，發叔只好要求政府考慮其他選址。
其實又好難怪班村民，事關當初有成廿個選址，最後又係選中厭惡設施集中嘅屯門區，有村民呻話：「之前起大欖涌監獄、起小欖精神病院我哋都冇怨過，六合彩又唔見我哋中喎！」