議員以政治原因集體請辭，然後又一齊落場競逐補選，香港前所未見，港府要防止泛民不斷重演辭職騷，惟有集中火力鑽研外國做法，希望趕及明年就二○一二年兩個選舉辦法作本地立法時，一併修例。港府嘅研究機器啱啱開動，當然無咁快有傾向性方案，不過，初步嚟睇，政府覺得現時建制派提出嘅兩個方案，都唔係咁行得通。

慳錢易操作合憲法

好似規限議員辭職後唔可以喺當屆重返議會，先唔講有冇違反《基本法》保障市民有被選權同選舉權嘅條文，從政治現實層面睇，根本發揮唔到阻止泛民玩嘢嘅屏障作用，舉例九西黃毓民辭職，社民連搵陶君行參與補選，一樣可以掀起政壇風雨，五區如是，又嘥你一億五千萬元，你都奈佢唔何！

至於規限議員當選之後唔可以隨便辭職，更加行唔通，市民有被選權同選舉權，更加有辭職權；再者，如果辭職者唔再履行職務，唔通政府繼續支薪畀佢養懶人？實畀公眾鬧死！

反而，港府喺研究外國做法過程中，發現澳洲某省議會，規定以自動遞補方式填補議席空缺嘅模式，值得香港參考，易操作，又慳錢，最重要係合憲合法，有先例可援，經得起司法覆核。呢套模式香港人其實唔會陌生，港區人大亦都用緊，特區成立以來，有兩屆由於有人大代表過身，梁秉中兩次都以得票排名第三十七名遞補成為人大代表。

如果遞補模式套用喺今屆立法會選舉，五大直選選區中嘅五名得票最高落選者，即係港島勞永樂、九龍東陶君行、九龍西毛孟靜、新界東田北俊同新界西張超雄，就可以冷手執個熱煎堆，進身議會。不過，話說回頭，如果港府依家行緊呢一套，睇怕公社兩黨亦唔會咁偉大辭職，益咗對手，所以下年政府若然建議以此模式修例，相信泛民第一個舉手反對！