香港過年氣氛愈來愈淡靜，農曆新年將至，唔少政商界名人寧願外遊避年去也。日本、美國向來是首選，今年風水輪流轉，陽光燦爛嘅泰國跑出成為大熱門，立法會議員梁君彥（Andrew）及前商務及經濟發展局局長馬時亨都話會去泰國打高球；旅發局主席田北俊就帶孫仔去日本滑雪；老牌玩具廠開達集團董事長丁午壽度假不忘工作，去德國順便睇埋玩具展。
肥亨梁君彥過高球癮
泰國消費一向平靚正，講到驗身，肥亨都揀泰國，早前幫襯前行會成員陳智思間「泰國康民醫院」，由頭驗到落腳只係三千幾蚊。肥亨早上八點去驗身，下午一點已睇到報告，健康指數靚到極，肥亨放下心頭大石，趁新年攜家人同遊泰國蘇梅島，順便同細女切磋高球技術。
咁啱得咁蹺，Andrew梁過年都揀遊泰國，同太太囝囝梁宏正、新抱、囡囡、妹妹一行六人，去足一個星期，地點係泰國皇室度假勝地華欣。當地高球場綠草如茵，Andrew同囝囝大可過足高球癮，太太等一眾女將就可以去浸spa，各自各精彩。今次係Andrew第一次去華欣，佢話全程由新抱安排，呢個老爺好識歎！
田少同乖孫日本滑雪
過年暖笠笠固然有氣氛，但田少愛冰涼，打孖上帶住兩個乖孫去日本滑雪。大孫早有滑雪底，但細孫就未玩過，為免細孫無癮，田少出發前專程帶細孫去北角上番幾堂滑雪入門班，諗得好周到！至於丁午壽就揀去德國紐倫堡睇玩具展，順便品嘗地道德國菜。
名人爭出門，女大班恒生行政總裁梁高美懿就唱反調留港度歲，尋日梁太拖埋媽媽、老公及姪女去香港會開餐，佢話新年節目多，初一例牌同奶奶拜年，又會趁當日食素，然後買定靚雞同肥魚預備一頓豐富開年飯，忙到氹氹轉，又點得閒出門。
立法會議員陳健波都話加入留港一族，佢份人唔鍾意同人逼，新年喜歡同親友聯誼吓，遲啲先去旅行喎。
卓妮