金鐘添馬艦新政府總部「門常開」工程預備用三千幾萬元購置藝術品擺設，當中立法會新大樓佔咗一千二百萬元。立法會行政管理委員會轄下藝術委員會，日前就討論擺放藝術品問題，最後決定透過公開比賽，由評審委員會選出優秀作品，將來放置在新大樓內外。
據講評審委員會將開出兩項條件，藝術品要顯示立法會獨立性外，還要有香港嘅特質。不過，有啲參賽作品可能備受爭議，例如有人整隻巨蕉模型凸顯議會嘅掟蕉文化，又會否接受呢？答案係交由評審委員會決定。委員會組成包括主席、兩名行管會議員、一名傳媒代表及七位藝術家，大部分係外來人，由此迸發出無限創意就最好嘞。
其實立法會都考慮過其他購置藝術品方案，包括購買製成品、向康文署轄下博物館或私人機構借用藝術品、接受捐贈，但最後都係決定選用公開比賽，唔知隔籬嘅新政府總部大樓有冇咁開放呢？