本文重點
香港回歸十二年多，政府一早已將好多英國殖民地色彩嘅事物入土為安，但有區議員近日就收到政府一封「為英女王陛下效忠」嘅信件。油尖旺區議員陳偉強最近去信運輸署九龍區交通工程部，投訴工程師濫用停車許可證，該署派人送上覆函，但信封又黃又舊，封面仲印上「ON HER MAJESTY'S SERVICE（為英女王陛下效忠）」，陳偉強當堂嚇咗一跳。
辯稱「一時唔小心」
陳偉強就呢個陳年信封向運輸署查問，獲得回覆係「一時唔小心」，但好似唔當係乜嘢一回事，唔通係為咗環保？
陳偉強批評，香港回歸十二年多，相信各政府部門有充裕時間更換內部前殖民地物資，但至今竟然仲有呢啲殖民地信封存在，仲要使用送埋出街，確實極為諷刺，亦對國家好大嘅侮辱。佢估計其他區議員可能收過呢類信封，只係佢容忍唔到有咁嘅情況喎！