公民黨同社民連策動「五區公投」，係咪好似香港總商會主席包立賢所講危害香港繁榮，要留待歷史見證，不過，話佢哋害慘十四位身兼港區人大、政協嘅立法會同僚，相信唔錯得去邊。事關每年三月「北京」兩會期間，立法會要確保湊夠法定人數嘅三十人開會，都相當掹掹緊，成日險象環生，今年泛民陣營少咗五件，令流會風險激增，十四位要上京嘅議員今年隨時要京港兩頭騰，齊做空中飛人，以防流會鬧劇重演。
《基本法》第七十五條訂明，立法會舉行會議嘅法定人數不少於「全體議員」嘅一半，五名泛民議員辭職之後，「一半」係指三十人定二十八人？立法會主席尋日打安全波，敲定維持三十人不變，至於「全體議員」定義，由於涉及重大議案須三分之二議員嘅極敏感問題，例如嚟緊表決政改方案，同埋彈劾爆炒女助理醜聞嘅甘乃威，主席唔敢掂呢件燙手山芋，交波畀議員規則委員會討論。
立會開會撞晒期
開會法定人數定為高標準嘅三十人，隨即引起建制派一片恐慌。每年「兩會」期間，身兼港區人大、政協嘅議員都要上京開會，一走就十幾人，建制派呈近半真空狀態。而今年政協、人大「兩會」分別喺三月三日同五日開幕，一直去到十三日同十五日，期間同兩個星期三大會與星期五內會重疊。建制派中有十四人須上京開會，本來已經有湊唔夠法定人數開會之危，依家再撞正五名泛民議員辭職，情況雪上加霜，僅有四十一人留守議會，風險系數大增，建制派惟有急謀對策。
做定準備兩頭騰
身兼港區人大嘅自由黨主席劉健儀話，身為內會主席嘅佢，準備咗喺立法會開大會及內會嘅日子，都會飛返香港主持會議。嘩，呢份機票開支都幾大，另一位港區人大、工聯會黃國健（KK）指，為免流會，十四位上京開會嘅議員，已經做定心理準備京港兩頭騰，為繁重嘅兩會工作再添疲憊，如果想將影響減至最細，可能就要大家抽籤，抽輸嘅七個就犧牲小我頻撲啲，返港湊夠人數開會，唔使十四個人綑綁式「班師回朝」，你估做空中飛人真係好過癮咩？
身兼港區全國政協委員嘅民建聯主席譚耀宗則重提「兩會」期間立法會休會建議，相信獲支持機會亦唔大，即係話，十四名建制派議員打定輸數做空中飛人都得嘞。