每逢過年倍思鄉，即使扎根香港多年，身為山東人嘅前廠商會會長尹德勝仍視山東菜為團年飯首選，呢日佢相約山東青島同鄉、水餃王后臧健和去美利堅京菜開餐，點一客清蒸鰣魚及山東餃子，啖啖都係山東濃情。
山東菜其實是北京菜的基調，講起食京菜，尹德勝最在行，佢自爆爸爸五十年代已開設京菜館豪華樓，曾邀請中國著名畫家張大千去酒樓傳授烹調雞鮑翅秘技。論識飲識食，山東人絕不遜色。
講到最愛嘅菜式，尹德勝話非蒸鰣魚莫屬:「鰣魚食落較多骨，但魚味香，肉嫩滑，非其他靚魚可媲美。」蒸鰣魚要將魚劏開一半，稱為「一扇魚」，放上冬菇及金華火腿一齊蒸，魚香倍增。唔好忘記喺熱騰騰嘅鰣魚上倒上秘製山東醋。尹德勝笑言食山東菜多年，呷醋也多，不知不覺連傷風感冒都少埋。
嘗盡天下美餃嘅臧姑娘就點咗味魚餃子，餡料用上了馬介休及杞菜，食時配上加入蒜蓉嘅山東醋，正到唔停得口。美利堅對臧姑娘意義深，佢話初來香港時三餐不繼，但每次思念家鄉時就會帶埋兩個女兒大擦一餐，破費一次，如今貴為水餃王后，就會請山東老鄉嚟美利堅作客。