自由黨前主席田北俊平時西裝骨骨，但亦有豪邁瀟灑一面。卓妮日前出席自由黨新界東支部團年晚宴時，見到身穿皮褸嘅田少佩戴一隻實而不華IWC Mark XVI鋼帶飛行腕錶，襯到絕一絕。原來隻腕錶係囝囝田啟文多年前送贈，價值三萬多元，田少當正係寶貝，出海同滑雪都係戴佢，佢話最鍾意就係錶面黑底白字，數目字又夠大隻，簡潔易讀，時間一目了然。
IWC飛行腕錶誕生於一九三六年，係第一枚正式通過英國皇家空軍認證嘅官方飛行腕錶，當時已搭載高抗磁機芯及防撞擊玻璃鏡面。到咗呢一代Mark XVI，腕錶功能進一步提升，附有日曆顯示及中置秒針備掣停功能，而軟鐵殼保護機率芯免受磁場效應影響，錶鏡則採用凸狀藍寶石玻璃，而且具備六十米防水功能，就算田少坐遊艇出海潛埋水都無問題啦！