本文重點
千億遺囑大戰落幕，龔家前晚喺自己主場荃灣如心海景酒店搞慶功宴，筵開三席同至親友人食飯。龔家向來低調，前日中午先決定開餐，所以只係Book咗酒店偏廳，菜式有煎魚嘴同扒時蔬等，簡簡單單，不過卓妮就反而覺得好有家常便飯嘅親切感。
贏咗官司，前晚呢餐飯龔家上下都食得特別輕鬆，但係身為主人家嘅龔仁心夫婦同兩個姐妹依然無待慢賓客，分坐三席招呼各方親友。龔醫生同並肩作戰咗多時嘅華懋董事梁榮江、身兼集團法律顧問嘅全國政協黃英豪（Kennedy）、城大校長郭位、時富投資集團CEO關百豪等老友坐埋一枱。太太劉元春就同華懋一班好手足坐，至於因心同中心兩姐妹就同啱啱小登科嘅龔仁心二仔龔皓陪龔媽媽坐一席。龔醫生雖然無同龔媽媽坐，但就不時過枱向媽咪噓寒問暖。
呢餐飯講明係家宴，並非要鋪張，但係幾年來幫華懋做法律顧問嘅黃英豪就「唔聽話」，特別帶咗支近廿萬嘅三公升82年Lafite到賀。黃英豪話單官司判咗之後，佢太太、囡囡甚至秘書都叫好，加上今次嘅遺產喺用嚟做善事，咁有意義，所以佢知道結果後都好開心，特別攞支珍藏嚟高興吓。Kennedy話雖然佢得呢支係頂級靚紅酒，不過酒逢知己，所以一啲都無唔捨得。因為餐飯好遲至約，佢六點幾拎支酒過嚟，等到九點幾先飲得，最後大家齊齊乾杯，不知幾高興。
龔太想過番低調生活
卓妮都有去到慶功宴，見到龔太，佢一講到影相就怕怕，佢話呢年幾嚟，經常被傳媒追訪，有時連去超級巿場都畀人跟，搞到佢依家好怕影相，隨住單官司結束，佢希望各方傳媒可以放佢一馬，畀佢哋一家過番以前低調嘅生活。
卓妮