「炒蛋」配「多士」，聽落好平凡，卻是快、靚、正之選，啱晒講求效率嘅香港人。位於佐敦白加士街嘅「澳洲牛奶公司」以滑溜炒蛋及鬆軟厚多士見稱，每天賣到門庭若市，立法會議員林大輝都幫襯足廿幾年，一個月都會返去食一、兩次，依然食得好滋味！
大輝話，當年喺理工學院讀緊紡織及製衣學系時已慕名幫襯，幾個同學仔邊歎炒蛋多士邊笑談校園逸事。眨吓眼廿幾年，份常餐已加咗價，但炒蛋風味歷久常新。做咗議員後，大輝照樣嚟做茶客，柯打一份足有成二吋厚嘅炒蛋多士，加上一碟叉燒意粉及香滑奶茶，埋單只係廿八蚊，抵食。
講開又講，大輝最近馬運亨通，愛駒「極奇妙」尋日出戰沙田馬場爆冷贏第二，場賽事屬盃賽，獎金高達九十九萬元。大輝賽前打定輸數，點知最後捧走巨額支票，認真肥仔，佢話晚上踢波後順便請波友大擦一餐慶祝吓。
卓妮