本文重點
睇一個人點着衫，就能夠透視一個人嘅性格。一手創立成衣零售連鎖品牌G2000嘅自由黨常委田北辰，有自己一套着衫哲學：恤衫同領呔永遠唔玩撞色，嫌江湖味太重；喜慶場合唔會紅呔襯黑西裝，怕太沉悶。着衫襯色好多男人都識，田北辰特別之處，係可以將自己嗰套推己及人，將旗下連鎖店嘅領呔，一律打上編碼，邊條呔同邊幾款恤衫最襯色，一件件幫顧客安排好晒。呢個就是田北辰！
早前卓妮行過中環，見到田北辰企喺皇后大道中嘅G2000分店櫥窗前，目不轉睛打量櫥窗公仔身上嘅衣服，然後，嚟突擊巡舖嘅佢，順樓梯直落男裝部、女裝部，身後有一對男、女職員恭恭敬敬地講解店面情況，田二少聽多講少，反而會不時伸手摸吓啲衫嘅質地，再露出一個若有所思嘅神色。最後，田二少行到領呔部，呢度似乎係佢嘅心血所在，佢一手抽起幾條領呔，走到鏡前左拼右拼，搞咗十分鐘，二少揀咗五條呔，去cashier埋單走人。
只打自家品牌領呔
政壇好多人都知道，田二少着衫相當講究，而且只係打自己公司品牌嘅呔，可謂自信爆棚！當城中富豪每朝清晨上高爾夫球場打波時，田二少就喺屋企衣帽間做腦部運動——絞腦汁揀一套適合當日場景嘅衣飾。衣櫃內嘅恤衫同領呔，同一色系由深至淺整齊順序排好，似排兵列陣，更似行軍打仗，任佢調兵遣將，指點江山。
田北辰仲將家中嘅衣櫃，延伸到旗下品牌嘅男裝部，唔止領呔嘅擺放模式相似，每條領呔嘅編碼，都係佢心中喜愛嘅密碼，顧客按「碼」索驥，喺恤衫部輕鬆配到最啱襯色嘅恤衫。二少連衫呔襯色都幫人諗好埋，相信自己一套最正，呢份自信，好多管理人都自愧不如！
卓妮