呢嗱，近年教育當局大開殺戒，殺完小學，跟住就嚟殺埋中學，收生不足就即時關門，冇得傾，搞到唔少校舍人去樓空。香港土地資源矜貴，對非牟利機構嚟講，搵租金低廉嘅地方經營係最頭痛問題，丟空嘅校舍正好為佢哋提供拓展機會，公共資源得到充分利用，市民又可以獲得更多服務，直頭Win Win雙贏啦。

可惜，任何好事一落到呢個政府手上，十居其九冇乜好結果。呢，當局殺校雷厲風行，手起刀落，但殺完就關人個關，理都唔理，情願睇住空置校舍漚蚊養老鼠，都唔肯爽手啲租畀非牟利機構。依家全港共有四十三間空置校舍，批咗畀非牟利機構租用嘅只有三間咁大把，使用率一成都冇，白白浪費公共資源。

更加離譜嘅係，當局對空置校舍闊佬懶理不特止，仲諸多理由阻撓同拖延有關申請。呢，元朗浸信會想租用前嶺文小學校舍提供社區服務，勢估唔到份申請喺政府各部門之間遊花園遊咗兩年幾，直到舊年五月終於獲地政處批准，但一個月後規劃署至批許可證，又再等多兩個月至正式簽約。

拖得幾拖，教會可以使用校舍嘅時間得番九個月，更弊嘅係校舍丟空咁耐漚足咁耐，要揼一大筆錢裝修，扣埋工程時間，實際使用期限得番半年。費時失事，得不償失，教會最後惟有放棄計劃。

唔止非牟利機構申請遇到諸多阻滯，就算當地居民有意善用呢啲資源，當局一樣阻頭阻勢。大嶼山梅窩窩田村村民希望將空置校舍改成鄉公所，申請咗五年都冇聲氣，早排突然收到有關部門通知，限時七日諮詢，冇人反對就要拆校舍，除非村民自行證明結構安全，咁即係擺到明有意刁難，唔想畀村民用校舍啫。

當局對使用空置校舍根本就冇完善規劃同申請機制，明明對庫房有益，對市民有利，卒之都要搞到一拍兩散。有心人希望使用空置校舍，皆因官僚從中作梗，只能望門興嘆，校舍變咗蚊竇、老鼠竇，唔止造成公共資源極大浪費，仲影響埋環境衞生。咁做法直頭愚不可及，正如有立法會議員話齋，空置校舍簡直係政府官僚主義嘅最佳寫照！

其實一字咁淺，政府官員根本就係懶字當頭，將公共資源唔當一回事，為咗自己做少啲，話之你浪唔浪費吖。對於佢哋嚟講，如果將校舍租出去，自己做多咗不特止，第日仲要孭埋監管責任，有起事上嚟又要解釋。「多做多錯，少做少錯，唔做唔錯」，呢十二個字咪就係港府官員嘅座右銘咯。

計功夫茶話齋，旨意呢班官僚善用公共資源，同去問和尚借梳一樣，嘥鬼氣！