娥姐果然「好打得」，前晚無瞓，尋日仍按既定行程連踩幾場，晨早先同立法會海濱規劃小組委員會成員去尖沙咀星光大道、馬灣公園及青衣城一段海濱長廊視察，行程完畢前仲同議員齊齊去荃灣玄圓學院食齋，下午出席議員涂謹申位於塌樓現場一街之隔嘅新辦事處開幕，並與在場保安局局長李少光等嘉賓一齊為塌樓死難者默哀一分鐘。

阿涂新辦事處位處嘅唐樓亦有五十三年樓齡，喺結構安全上屬高危一族，問娥姐驚唔驚再塌樓？佢就微笑話唔驚，然後上車走人，再到隔籬街塌樓現場再次視察。其實到咗呢個地步，睇嚟娥姐驚都無用，除咗加快驗樓外，求神拜佛望唔好再有塌樓傷亡好過喇。