今時今日環境保育已經係香港嘅大議題，要提醒政府做好保育，除咗上街示威，仲有啲軟銷嘅方法。立法會建築、測量及都市規劃界代表劉秀成就選擇咗做月曆，每月每日都提醒大家保育嘅重要性。
劉秀成每年都親自設計月曆送畀新知舊雨，今年主題係佢親手速寫香港舊建築物，包括重建前嘅香港會會所、舊滙豐銀行總行、皇仁書院前身中央書院、舊郵政總局、前利舞台劇院、舊中環天星碼頭等十二棟已經被拆除建築物做主題，希望由此凸顯保育嘅重要。
劉秀成所選全部都係啲自己好鍾意嘅建築物，佢慨嘆社會好多時唔係好重視保育，一啲好靚嘅建築有時好快就拆咗，諗起都心噏。
雖然劉秀成唔肯透露花咗幾多時間嚟畫月曆，不過傳聞佢有時都鍾意喺會議時畫吓素描，五人總辭之後，開會速度快咗，睇嚟佢第日都要真正抽時間出嚟先畫到畫嘞！