八和會館主席汪明荃過去多次批評政府推動粵劇不力，又擔心業界青黃不接，呻到樹葉都落埋。粵劇界踢一踢，政府終於郁一郁，透過職業訓練局及旗下「IVDC」匯縱專業發展中心與八和會館合作，為粵劇界從業員開辦再培訓課程，仲誠邀汪阿姐做推廣大使添，汪阿姐條氣當堂順番晒。
汪阿姐尋日出席粵劇課程推廣活動時全程風騷笑晒口，仲力推培訓課程可以幫助粵劇界從業員「升呢」，提升技能後有更多出路。問汪阿姐會否幫手教戲，佢就好謙話：「我邊有資格教學生吖，家英哥（羅家英）同阮兆輝就有資格教嘞，兩人喺戲班出身，大戲嘅排場係佢哋先至識，可以勝任教學生。」
有關粵劇培訓課程將會開三至四班，每班十二人，由粵劇資深大老倌任教，但現時IVDC已有個興趣班課程，教授粵劇基本身段、造手、走位。多啲人學大戲，汪阿姐就唔使擔心冇人接班喇。