新界鄉議局喺沙田嘅新大樓嚟緊一、兩年內相繼落成，鄉議局主席劉皇發好快就可以卸下心頭大石，所以佢心急催谷接班人都可以理解。鄉議局副主席張學明尋日喺屯門開議員辦事處，發叔做主禮嘉賓，大讚學明有學識、有政治觸覺同遠大目光，又有愛國愛港嘅情懷，多年來仲為新界同香港作出咗重大嘅貢獻添。發叔咁重手，聾嘅都聽到，「交棒」呢個動作，已經十分清楚。
問到張學明喺屯門開設新嘅辦事處係咪為咗接發叔棒而鋪路，佢就笑笑口咁話完全唔關事，叫大家唔好諗咁多喎。佢仲好謙咁話，自己完全冇諗過要接任做鄉議局主席，可以嘅話希望發叔能夠繼續留任。學明對發叔，時時刻刻都係咁尊重。
對於上水鄉事委員會前日喺河上鄉安排咗班長者堵塞通道，令到地政總署人員唔能夠如期清拆「霸王屋」，發叔義正辭嚴，話對佢哋嘅做法感到遺憾同不滿，認為真正為鄉事服務，鄉事委員會應以磋商方法解決問題。