阿涂尋日為新辦事處舉行開幕禮，保安局局長李少光、發展局局長林鄭月娥，同埋民主黨副主席劉慧卿都畀面捧場。前日發生咗咁大宗意外，所以個開幕儀式決定一切從簡，舉行前仲先為意外中嘅死者默哀一分鐘。

嫌月租九千太貴

阿涂呢個辦事處位於土瓜灣榮光街一個地舖，原來佢先前物色地點嘅時候，曾經考慮過與倒塌大廈兩幢樓之隔嘅一個七百呎閣樓單位，事關嗰度喺正大馬路，人流必定暢旺，不過月租要九千蚊，咁啱榮光街地舖面積差唔多，月租八千蚊就搞掂，所以扑錘成交。今次阿涂因為慳錢而執番身彩，佢太太蘇麗芬都話阿涂福大命大喎！開張完畢，阿涂即刻走咗去現場視察，仲話打算晏啲再去探訪一下受影響居民。

唔單止阿涂，其他九龍西議員都迅速回應呢宗意外。好似民建聯李慧琼前日率先到現場視察，尋日再去聖匠堂社區中心探訪受影響居民，佢話九龍城嘅區議員準備自掏腰包，一齊夾錢捐畀死者家屬。民協馮檢基同埋專業會議梁美芬，尋日亦相繼開記招回應意外。

即使唔係議員，但積極喺九龍西做嘢嘅自由黨常委田北辰亦唔執輸。田二少話前日視察意外現場後個心好唔舒服，即晚就開會決定由自由黨關懷基金撥款賑災。尋日佢聯同基金負責人一齊將啲錢以寫有「一點關懷」嘅信封袋好，透過九龍城民政事務處轉交畀四十二名受影響居民。各黨各派鬥快做嘢都係好嘅，最少可以為居民送上點點關懷同實質嘅援助。