本文重點
為人父母望完仔女結婚再望抱孫，但自由黨主席劉健儀（Miriam）就跳咗一步，事關其乖仔劉偉釗仲讀緊書，佢就已經好恨抱孫嘞。前晚自由黨新界東支部食團年飯，Miriam見到黨友個乖乖女即時嚷着要抱抱，不知幾肉緊。
肥仔張赴美探孫
Miriam話，已經好耐都無抱過小朋友，問佢係咪好恨抱孫？Miriam就笑笑口話：「幾時得嚟吖，囝囝仲讀緊書，畢業至算啦！」其實恨抱孫又點只Miriam，副主席張宇人（Tommy）咪係一樣，下星期就會飛過紐約探望四個月大嘅乖孫Evan。
Tommy呻話，Evan舊年十月出世時，原本有機會第一時間飛去探乖孫，但老婆大人話佢身形太大份，個女間屋住唔落喎，好彩個女早前聖誕帶埋囝囝返香港探佢，氹得佢鬼咁開心，但依家又心思思想過去抱孫嘞！
卓妮