本文重點
食神葉澍堃教落，要食好嘢，最緊要有窿路。立法會漁農業界代表議員黃容根就係最佳例證。卓妮周不時都聽根哥講香港出產嘅漁農肉產好新鮮，早幾日卓妮特登跟根哥一齊入新界買食材，嘗下香港土產鮮味。根哥首先帶卓妮去買菜，不過唔係去街巿，而係直接落田摘。根哥入到去健康有機農場，就同場主梁本堅一齊落田掘當造蘿蔔，又摘咗斤新鮮豆苗，卓妮搣咗塊豆苗落口，其鮮甜甘美，真係喺街買唔到。
百日雞 元朗烏頭
買完菜，根哥帶卓妮去佢老友新界養雞同業會理事長李良驥嘅農場買百日雞，李生仲送咗盒新鮮蛋畀根哥加餸，入面有啲仲係雙黃嘅添。有菜有雞，根哥話欠條魚，於是拿拿臨帶卓妮去元朗楊氏水產魚場搵佢老友楊瑞良，揀咗兩條正宗元朗烏頭。買齊餸，可以開飯啦！
根哥話食材夠新鮮，點煮都好味，好似隻雞咁，只要搵鹽輕輕擦一擦，再大火隔水蒸就可以。至於烏頭最怕有泥味，不過楊瑞良就話泥味係魚塘嘅水藻造成，佢哋用科學方法調校魚塘鹽度，絕無泥味。兩條烏頭，根哥一條用檸檬蒸，另一條就用佢哋水上人傳統，用蘿蔔煮，至於菜就用最簡單嘅清炒煮法。呢一餐果然係雞有雞味，魚有魚味，菜有菜味，正！
卓妮