中大香港亞太研究所最新民意調查顯示，超過三成四受訪市民對政府嘅表現感到不滿意，較上月勁升四點五個百分點；曾蔭權以及三名司長嘅民望全線下跌，受訪者對煲呔曾嘅評分只錄得五十點一分，創○五年七月上任以來新低。換句說話嚟講，最近慘遭後生仔大鬧禮賓府搞到「家宅不寧」嘅政治家愈做愈衰，好快有可能衰過老董舊時。

唉，比五十分合格線只係多咗○點一分咁大把，講得形象化少少就好似有個抹窗工人命懸一線，一個唔覺意就會仆落街。點算好呢？有冇辦法止跌回升民望反彈？計功夫茶話齋，辦法唔係話冇，一來睇下曾蔭權自己識唔識做，二來睇下曾氏同鄉會沙煲兄弟財爺曾俊華爭唔爭氣。

曾蔭權嗰筆一匹布咁長，不如先講講曾俊華嗰筆，因為簡單少少。呢嗱，最新一份財政預算案即將發表嘞，假如鬍鬚曾寫得好好睇睇，誠心誠意推出惠民政策，民望即使唔回升，起碼唔會繼續跌先吖；如果又係孤孤寒寒推出「無糖方案」，功夫茶敢寫包單，命懸一線嗰一條線肯定會啪一聲斷鬼咗，抹窗工人嗖一聲直仆落街。

吖，順帶一提，曾俊華嗰一輯宣傳財政預算案嘅電視廣告，唔該拍過另一輯啦，堂堂財爺搞到好似偷偷摸摸攝青鬼咁，成何體統呀！

言歸正傳，話就話政府估計財政赤字會有接近四百億元，之但係你估下事實會係點吖嗱？畢馬威會計師事務所就有一個咁嘅預測，佢哋話喎，今個財政年度經濟反彈，令申請暫緩繳稅嘅個案減少，而且樓市股市暢旺，印花稅可望增加約一百四十億元，加上成功拍賣大埔白石角地皮，令整體收入比原先估計嘅多。加減乘除之下，畢馬威會計師事務所合夥人王尹巧儀嘅結論係，本年度財赤會縮減至一百三十四億元。

嘩，你都咪話唔得人驚，曾俊華數口原來真係好爛㗎！上次佢話財赤嚴重，點知變咗盈餘，今次又話財赤厲害，可能又係誇張。喂，財赤接近四百億變咗百幾億，相差二百幾億，就算唔笑你數口爛，功夫茶都要為民請命講一句：財爺，既然庫房慳番二百幾億，係時候開倉派米喇啩！

即係咁，如果曾俊華識得還富於民，救濟水深火熱嘅百萬窮人，曾蔭權政府嘅民望咪有機會回升囉，如果唔係咯喎，大家知道後果會係點。

好嘞，講完曾俊華，當然輪到契大佬曾蔭權。不過呢單畸屎非常棘手，你知啦，煲呔曾施政有太多缺陷，要政治冇政治，要經濟冇經濟，要民生冇民生，要基建冇基建，要高鐵……唔好意思，係有高鐵嘅，不過有高鐵嘅代價係社會出現極富爭議性嘅深層次矛盾，家陣冇人知道真正動手清拆菜園村嘅時候會發生乜嘢事。

講真，想救曾蔭權民望極難極難，惟有寄望曾俊華做番一齣好戲。一句講晒，假如財爺唔派米，人人民望冇得救！