狂抽水仲未瞓醒

繼早前「搞事四人幫」嘅密友天主教前香港教區主教陳日君高調呼籲教友支持總辭後，四人幫之一嘅民主阿婆亦都唔執輸，再度發功。佢尋日一開場就狂抽煲呔曾嘅「跛腳鴨」政府水，話政府透明度唔高之餘，仲漠視民意，完全唔掂。之後民主阿婆愈講愈興起，仲話香港之所以有今時今日嘅法治同自由，完全要歸功於歷史上嘅一個「意外」，令香港有機會畀英國管治咁話。

香港雖然已經回歸咗十二年，但好明顯，民主阿婆仍然好迷醉喺佢嘅港英夢當中，咁多年都未瞓醒。

不過時下嘅學生都有自己嘅獨立思想嘅，有一個「九十後」嘅學生就即場踢爆民主阿婆，質問佢點解當年仲喺港英政府做高官嘅時候，唔幫香港推動民主，依家回歸咗、佢又退埋休，先出嚟多多聲氣搞搞震。

遊花園解畫卸膊

民主阿婆聽到條問題當堂嚇呆咗，之後就開始帶大家遊花園，話民主唔可以第一日就推行嘅，又由香港五十年代嘅歷史講起，話當年有大批大陸難民湧入香港，政府需要處理房屋同教育問題嘅當務之急先喎，又話依家香港發展成熟喇，先係爭取民主嘅時候，總之就將自己嘅責任推得一乾二淨。不過佢最後都認衰，話當年港英政府可能可以做多啲嘢，但又死撐發展民主要「循序漸進」，總之佢嘅邏輯就混亂到難以理解。

民主阿婆仲話，喺香港做特首唔單止要高調，仲要隨時推行一啲違背自己原則嘅政策，所以自己從來都冇諗過要去選喎，又話冇後悔自己提早退休嘅決定添。講就講得好聽，不過俗語都有話：「吃不到的葡萄是酸的」，呢句說話放喺民主阿婆身上就最啱嘞。