扮嘢大賽旨在向擔任愛滋病基金會主席多年嘅金刀梁致敬，比賽當日梁智鴻太太馮令儀有份做評判，而舉世知名嘅愛滋病專家何大一博士都在場湊熱鬧，已經好多人諗住要參加。要扮金刀梁，用髮乳梳番個中間分界頭同戴粗黑框眼鏡係基本造型，不過可掬笑容同筆挺西裝、雪白恤衫都好重要。

梁智仁耍手擰頭話咪搞

扮嘢冠軍嘅獎品仲未講得定，有人講笑就話由金刀梁操刀送出手術一個，金刀梁有名你叫，佢做手術好貴㗎。金刀梁嘅弟弟、公開大學校長梁智仁同哥哥生成同一餅印，就算出場唔化妝都贏硬，不過當佢知道獎品係乜，立刻耍手擰頭，話唔使客氣喎。