立法會財務委員會本月十六日通過高鐵撥款後，反高鐵人士圍堵立法會，運輸及房屋局局長鄭汝樺及十九名建制派議員被困至翌日凌晨，喺警方護送下搭港鐵落荒而逃，混亂中各人變相搭霸王車。一班議員事後每人夾番四蚊畀港鐵以保清白之身，可惜未能甩身，仍有心水清嘅市民投訴一干人等違反鐵路附例。
立法會秘書處尋日接獲一名市民投訴，話根據鐵路附例，只有港鐵員工、員工家屬及巡邏警員，搭港鐵先至唔需要繳付車資，當日鄭汝樺聯同一班議員由中環站搭港鐵到金鐘站無畀錢，確係開咗先例，要求部門跟進。投訴人話當日參與行動嘅警員雖然有畀錢，但呢班警員協助官員及議員搭霸王車，做咗幫兇。
不過，投訴人向秘書處表明今次並非投訴港鐵，只係提出上述兩點不滿，要求部門跟進。根據《香港鐵路附例》第十四條，任何人無票進入和乘搭列車、沒有繳付車費等，最高罰款五千元。官字兩個口，件事一定係不了了之㗎喇。