近排大學界嘅高層成日轉人，現任科技大學首席副校長錢大康尋日獲香港大學校務委員會一致通過任命，會喺今年暑假正式過檔，職位同樣係首席副校長，任期五年。校務委員會主席梁智鴻、校長徐立之尋日開記者會介紹錢大康，話由四十個候選人入面揀咗大學行政經驗豐富嘅佢，可以令港大再創高峰咁話。
錢大康經驗豐富就毋庸置疑，但佢自己都好坦白咁話，佢對港大嘅行政架構唔係咁了解，可以話係一個「外人」，亦都因為咁，佢希望將來可以引入新思維，除咗帶領港大國際化之外，亦會好注重學生嘅品德，會鼓勵學生做多啲社會服務，希望可以教好學生。
不過，如果遇着陳巧文呢啲咁激進嘅學生咪好頭痛？錢大康就話，學校支持學生關心時事，參加社會運動係無問題，大前提係要遵守法律，以佢自己為例，佢喺美國讀書時，都參加過反越戰嘅社會運動，仲話學生就好似自己嘅仔女，發生咩事學校都會盡力幫，但係佢點都唔肯評論陳巧文係咪過激。