全國政協委員李大壯近年形象愈來愈鮮明，唔係講緊政治或政黨立場，而係佢十年不變嘅唐裝Look。大壯話可能係年紀大咗，唔鍾意打呔咁拘謹，所以改着唐裝，過去五年以來日日着，而佢幫襯嘅係畢打行嘅上海灘。
雖然大壯話，佢一九八二年第一次訂造唐裝，隨後就愛上咗佢。佢原本搵固定嘅裁縫師傅訂造，但師傅被延攬為上海灘効力，佢惟有跟住師傅到上海灘啦！依家屋企衣櫃仲有老西，但係僅供紀念佢唔同時期嘅身形啫！
大壯又話，唐裝嘅好處係出席咩場合都得，白天嘅商務活動又得，隆重嘅晚會都得，人哋唔會覺得佢唔尊重個場合。咪睇大壯好似次次都着一樣嘅衫，其實內裏五顏六色，好似當日大壯手袖反摺後露出桃紅色，不知幾搶眼。
上海灘已經開咗十六年，好多名人雅士都係擁躉。上海灘售貨員同卓妮講，佢哋最受歡迎嘅係唐裝同旗袍，遊客多過本地客。大壯着開嗰啲唐裝通常係絲質或棉質，現貨約二千元，度身訂造嘅價錢則略貴。