香港地潮州人多，潮州菜百花齊放。潮州怒漢立法會議員詹培忠近日愛上位於灣仔道近舊灣仔街市嘅生潮軒，佢雖然食過無數潮式滷味，但係呢度嘅秘製滷水鵝肝及鵝片，都係令金勞詹唔食唔安樂。
生潮軒滷味正宗，皆因佢係西營盤老字號生記嘅分支，兩年前進駐灣仔鬧市，招牌滷水汁從總店分過嚟，甘香醇厚；店內的獅頭鵝日日由潮州運抵本港，滷出嚟嘅鵝肉嫩滑多汁。詹Sir最愛一味法式鵝肝潮食，其實係滷水鵝肝，味道甘香，不過大啖食一個鵝肝略嫌膽固醇高咗啲，詹Sir都驚肥，每次只敢食一至兩片。佢亦愛店內嘅潮式三吃，有齊鵝片、鵝肝及鵝腎，每碟盛惠一百六十蚊，但一次過嘗盡滷味幽香，抵到極。
呢度不但賣滷味，仲有百款潮州小菜，包括普寧炸豆腐、潮州炒魚麵及潮州翅等，難怪呢度已成為潮人飯堂。