憑反高鐵一役成名嘅八十後成為社會焦點，呢班青年好多都係大學生，大學校長嘅表態就備受關注。早前候任中大校長沈祖堯力撐八十後唔算激，但理工大學校長唐偉章就有彈有讚，佢尋日喺電台節目中話，大學生及年輕一代係社會棟樑，有點樣嘅年輕人，就有點樣嘅社會；近排八十後成為焦點，令佢諗起自己學生時期嘅一啲片段。佢記得六、七十年代美國掀起反戰情緒，好多年輕人對美國社會既有建制提出質疑，連當年著名樂隊Beatles都畀部分人視為反叛象徵。
睇番香港眼前，唐校長話部分八十後可能對現狀不滿，或者唔理解政府嘅決定，唔認同社會制度，甚至未能充分掌握全部事實，所以言語行動有時可能過於偏激，但佢相信佢哋都係有理想、有盼望、願意承擔嘅年輕人。相對於沈祖堯坦蕩蕩支持八十後，唐校長咁講法，有點兒明捧暗踩。
唐校長仲寄語年輕人喺學好兩文三語、掌握專業知識及技能之餘，仲要有國際視野、良好情緒智商同逆境智商，懂得解決問題等，做一個「講求實效的夢想家」！