華懋集團新掌舵人龔仁心近期喜事浪接浪，除咗喺家姐龔如心千億爭產案中贏咗個勢外，上月中又娶新抱，其細仔龔皓結婚成家立室，喺華懋集團旗下嘅荃灣如心海景酒店大排筵席，高高興興做老爺。不過話口未完，龔家又傳喜訊，有接近龔仁心消息人士透露，甚少公開曝光嘅龔仁心大仔龔颷，將升呢獲增選為四川省政協委員，更上一層樓！
四川省政協第十屆三次會議今日起喺四川省會成都舉行，會議有九項主要議程，其中一項就係補選政協委員，據講龔仁心愛兒龔颷都喺名單上，如無意外將順利當選。其實四川省政協都有不少來自香港嘅特邀人士，其中包括信和置業主席黃志祥嘅公子黃永光、華人置業董事劉鳴煒、工業總會副主席劉展灝以及被傳為寶蓮寺接班人之一嘅釋健釗等。近年來，龔仁心喺親中圈子相當活躍，去年中聯辦新春酒會，佢都有現身。