八十後青年圍堵立法會反對高鐵撥款，搞到運輸及房屋局局長鄭汝樺（Eva）同建制派議員被困六小時。經高鐵撥款一役，無論Eva抑或撐高鐵嘅一群，事後都猶有餘悸。Eva喺審議撥款當日以大眾人身安全為由，唔肯同班八十後青年對話，結果被外界鬧到反艇，於是尋日趁出席工程界社促會政改論壇時，借機與一班八十後及九十後工程界學生溝通補鑊。不過主辦機構不敢鬆懈，高度戒備防止有人踩場。
論壇尋日喺銅鑼灣怡東酒店舉行，所有人士進場前都要經過嚴格登記及確認身份，社促會高級副主席嚴建平介紹論壇流程時，亦重提早前召開撐高鐵記者會時遇到不速之客踩場，所以特別要求酒店加強保安，警告任何人在場喧嘩會被趕出場。
咁嚴密嘅保安，難怪Eva可以咁安心咁暢所欲言，會前佢同青年對話時自爆當年入住港大宿舍時，身為文科生嘅佢，遇過不少工程系同學，間中會充當「槍手」幫同學撰寫或修改文章，佢話理科學生計數叻，但講到寫文就唔夠文科生咁好嘞！