每年一度嘅「本地漁農美食迎春嘉年華」尋日又開鑼，年年都嚟做主禮嘉賓嘅全國人大常委范徐麗泰今年都唔例外，繼續捧場，仲話自己每年都好期待呢一日嚟掃貨；若然主辦單位唔請佢嚟，佢都會不請自來。咪以為范太喺度向主辦單位賣口乖，事實上范太尋日主持完嘉年華開幕禮後，立即身體力行「刺激經濟」，仲買得比去年多添！
話說開幕禮完咗後，主辦單位為一眾主禮嘉賓搞咗個導賞團，帶佢哋參觀參展攤位。只見范太左顧右盼，仲忽然彈咗句：「最緊要買嘢呀大佬！」好一副準備掃貨嘅戰鬥格。話口未完，導賞團一結束，范太一個箭步衝去海味舖，用二千八百蚊買咗十多塊每塊都大過手掌嘅花膠。
之後范太再戰乾貨攤位，以四百二十蚊買咗兩樽地寶粉、六條有「一夜情」之稱嘅「鹹鮮魚」同埋一大包蝦乾。范太仲教路話，平時煮湯麵時，可以落地寶粉代替雞粉，味道更鮮甜；平時佢就會將一包蝦乾放喺枱頭，睇書時用茶送嚟食就最正喎！
雖然掃貨掃得狼，范太謙稱自己煮嘢食唔算太叻，今次買咗咁多嘢，都係要聽奶奶嘅「指示」，由佢老人家發落點煮，自己只係做配角喎。