不過基本法委員會委員譚惠珠尋日上電台與公民黨余若薇過招時，忽然舊事重提，話田少當年反對廿三條立法，「奉旨唔聽話嘅」，根本唔算係建制派。不過田少並冇亂到陣腳，尋日反而借機再次向中央交心，仲話自由黨唔係「盲目保皇黨」！

反廿三條情非得已

隨着自由黨宣布不參與泛民五區總辭後嘅補選，建制派係咪參加今次嘅補選戰，更添不明朗因素。珠姐尋日出席一個電台節目時，再次呼籲各黨派政黨諗清楚係咪參加補選，諗清楚參選係咪變相幫公民黨同社民連所謂嘅「公投」甚至「起義」造勢。

出席同一節目嘅公民黨黨魁余若薇就反駁話，田少都講咗有意參選喎。點知珠姐衝口而出話，田少當年反對廿三條，佢「奉旨唔聽話嘅」，根本就唔算係建制派。珠姐此話一出，連建制派中人都有啲意外，事關佢哋未聞北京將田少摒出建制派噃。

話口未完，余若薇又話民建聯曾經支持○七、○八普選，點知珠姐又嚟一句：「民建聯當年唔識《基本法》。」至於此話何解，本身為民建聯成員嘅珠姐就無再解釋落去喇。

面對珠姐嘅講法，田少點都要作出回應。佢同我哋鄭重其事話，自由黨一直以來都係一個「以事論事、實事求是嘅建制派政黨」，但就唔係「盲目嘅保皇黨」。佢話過往政府提出嘅施政報告、財政預算案，以至絕大部分政策、法案同撥款建議，自由黨同佢本人都喺立法會投咗贊成票。

至於當年倒戈反對廿三條立法嘅舊事，佢重申呢個係「冇辦法之中嘅辦法」，相信中央同廣大香港市民都好清楚事件嘅背景。

俗語有云：「澆花要澆根，交人要交心」，田少第一時間表態，反應都好快。