本文重點
香港唐氏綜合症協會尋晚喺北角新光戲院舉行慈善粵曲欣賞會，一群熱愛粵劇嘅唐氏年輕人表演任白名曲《帝女花》，馬會主席陳祖澤（John）及民政事務局副局長許曉暉（Florence）亦粉墨登場，分別獻唱《碎鑾輿》及紫釵記之《劍合釵圓》，有十幾年唱功嘅阿John表現毋庸置疑，但初試啼聲嘅Florence亦唱得有板有眼，博得全場掌聲。
師承江雪鷺
粵曲欣賞會綵排期間，卓妮去咗探班，同Florence傾開先知道佢學粵曲只有半年，佢話當初機緣巧合下認識任白嘅徒弟江雪鷺，於是拜師學藝。咁啱得咁蹺，Florence嘅同門師姐亦係民政局嘅退休公務員，於是大家一齊切磋粵劇。Florence自爆話，因為工作經常遲到早退，但好彩天資搭夠，師傅同師姐都讚佢成績唔錯。
Florence尋晚同師姐一齊合演《劍合釵圓》，Florence演繹霍小玉，師姐就做李十郎，兩人合作無間。整個慈善晚會共籌得四十萬元，其中十萬元由鄉議局主席劉皇發女婿余漢坤代表信和集團捐出。
Florence初試啼聲，食物及衞生局副局長梁卓偉、財經事務及庫務局副局長梁鳳儀、政制及內地事務局副局長黃靜文齊齊去撐場。
卓妮