余錦基間私房菜「軟庫飯堂」位於砵甸乍街一幢舊式五層高大廈，喺其軟庫大廈辦公室隔籬，大廈梯間掛滿咗基哥咁多年嚟嘅威水照片，有賽車、足球、籌款、選美等，連洗手間裝飾都與眾不同，除咗掛上孔子《三字經》外，仲寫上十六字真言：「英雄豪傑，到此一遊；得大解脫，有小便宜！」每個角落都經過悉心布置。

每斤值過萬元

基哥話自己為食，加上午飯時間喺中環好難搵食，外間食肆又太油膩和太多調味，於是佢決定開間私房菜，得閒約朋友把酒談歡，講飲講食講享受。咁啱基哥早幾日約咗前高官葉澍堃（Stephen）到飯堂食晏，Stephen大讚飯堂位置適中，仲爆料話佢有份參與嘅小母牛籌款委員會經常會喺度開例會，順便開餐。

「軟庫飯堂」由入行廿多年嘅德師傅主理，德師傅拿手菜式多不勝數，例如鷓鴣粥、鮑魚炒三絲、古法鹽焗雞等，但最令人回味肯定係以六十年陳皮製作嘅菜式，包括陳皮牛肉餅、陳皮鴨湯、陳皮紅豆沙等，每道菜式均溢出陣陣陳皮香氣。六十年陳皮為最靚嘅廣東新會陳皮，有晒出世紙，每斤值過萬元，分分鐘貴過燕窩盞，所以陳皮紅豆沙賣幾百元一碗係有原因嘅。

近期好多人批評「八十後」圍堵立法會反高鐵太激進，基哥就只當佢哋開嘉年華，覺得無傷大雅：「我細細個住喺九龍城，當時起機場，一車車泥頭搬落去，居民又係鬼殺咁嘈；到起地鐵嗰陣，啲人又話香港咁細，起乜鬼吖！大家試諗吓，若然依家無地鐵、無新機場，香港會係點？」所以每個階段都有人反對政策。

佢寄言年輕人多參加運動比賽，從中學習接受失敗，遵守遊戲規則；佢話既然立法會投票通過撥款，大家就要接受現實！

陳皮紅豆沙	陳皮牛肉餅	乾鮑魚炒三絲

卓妮