港鐵尋日承認，東鐵前晚因數據傳送網絡系統故障，全線癱瘓一句鐘係人為錯誤，由於外來網絡供應商專家進行例行審核程序時，錯誤操作軟件程式，令中央控制中心五十七個操作平台全部停止運作，無法調配列車。換句話講，今次唔係港鐵嘅錯，而係外人嘅錯。咁都得！

唉，咁就畀佢哋玩殘嘞，當時正係放工繁忙時間，數以萬計乘客逼爆沿途各車站，狼狽不堪，直情七國咁亂。

港鐵公司事後死死氣向乘客道歉，其實，淨係道歉又有咩用吖。自從兩鐵合併後，服務冇改善到，反而事故愈來愈多，乘客唔方便事小，隨時搞出人命，咁就大件事嘞。最令人難頂嘅係每次發生事故，佢哋都淡化為「個別事件」。

今次係咪個別事件？呢點唔重要，最重要係東鐵及落馬洲支線全線停止服務一句鐘，絕對唔係小事，好彩係放工時間咋，如果係晨早返工返學時間，就更加大鑊。正如有立法會議員話齋，今次事故極之罕有及嚴重，絕對唔可以接受。

出咗咁大件事，政府有乜嘢反應呢？又係千篇一律，又係嗰幾句官腔。運輸及房屋局高官話喎，呢次故障絕對唔可以接受，運輸署仲罕有要求港鐵三日內提交報告添。鬼唔知阿媽係女人咩，問題係，唔可以接受又點呢？次次出事，次次都話唔可以接受，結果咪又係次次都接受！

其實，每次港鐵出事，班高官都係威係勢咁，話要嚴肅處理，可惜都係齋噏。先講運輸署，○三年就規定鐵路公司要就延誤八分鐘或以上嘅事故向當局通報，到依家為止，故障時數累積三千分鐘，但係當局仲係唔肯引入扣分式懲處機制。正如有立法會議員踢爆，當局嘅鐵路監察小組成為「三無」——無牙老虎、無權力、無資源，先至係港鐵事故不斷嘅主要原因。

講起機電署就仲離譜，今次港鐵數據傳送網絡出事，九成九係該署平時懶懶閒，又冇認真監管，又冇認真檢查造成嘅。仲有噃，因為成班官員條條Fing，港鐵好多月台幕門到依家仲未完成，搞到年年都發生幾單墮軌事件，講起嚟都心酸。例如有一次，有個乘客企喺月台度等車，畀架高速駛嚟嘅列車撞中，成個人飛出十幾米遠，撞落另一個乘客身上，造成一死一傷。

不妨舉多個畸士，前排有位七十幾歲英國阿婆返香港舊地重遊，搭火車四圍去，有次步出車廂時一腳踩咗落月台同列車之間嘅空隙，成個人被卡住。後來成班消防員出動埋氣墊，先至將佢拉番出嚟，但係隻腳已經救唔番。

一句講到尾，本港交通陷阱處處，連鐵路都靠唔住，令人步步驚心。話時話，香港假假地都係個國際都會，客似雲來，旅客有乜冬瓜豆腐，你話幾失禮吖！邊個仲敢再嚟吖？咪話功夫茶唔提醒，如果當局再係唔嗲唔吊，唔監唔管，遲早爆鑊杰撻撻嘅，到時睇吓點收科。