早前港大民調顯示，一眾上任逾年半嘅副局長認知度仍然極低，連港大民調研究總監鍾庭耀都話要即時中止調查，將經費放喺更有意義嘅研究上，明剃班副局長眼眉。食物及衞生局副局長梁卓偉唔知係咪睇完調查後唔忿氣，尋日一度喺立法會財務委員會大發神威，答問題有紋有路之餘，仲兩度寸爆長毛梁國雄！
財委會尋日審議北大嶼山醫院撥款，由於政府考慮緊喺第二期工程同私營醫療機構合作，長毛就質問梁卓偉，問到時中標嘅私營機構會唔會唔起醫院，定係起水療院同護老院？梁卓偉氣定神閒咁話：「其實諮詢文件好清楚寫明，中標嘅機構係一定要起醫院，梁議員你有時間（嘅話），不如睇吓啲文件先再問啦。」寸爆！
畀梁卓偉殺咗個措手不及，長毛亦唔服輸，再話沙田嘅「港安醫院」當年話會用兩公頃起醫院，點知最後起得一公頃都無，質問梁卓偉公私營合作最後會唔會又係出現類似情況？點知長毛今次又衰喺梁卓偉手上，佢繼續寸爆長毛，話沙田係無「港安醫院」，但仁安醫院就有間，長毛當堂瘀爆。連一眾高官議員都怕咗佢嘅長毛都敢寸，梁卓偉今次可謂幫一班副局政助出番啖氣！