香港人工作忙碌，難得過生日都會乘機放假，抖吓玩吓開心吓，不過人在江湖，放假都唔係自己可以決定。港協暨奧委會會長霍震霆呢位二月之星，生日撞正溫哥華冬季奧運會，所以無得放假，不過佢一啲都唔在意，事關生日年年有，賽事就唔係成日搞，到時要過去on duty都無say no。
不過咁，雖然生日要做嘢，但小霍就一啲都無唔開心，事關乖仔啟山到時會過去陪爸爸過生日，啟山話哥哥啟剛都應該會成行，但細佬啟人因為喺倫敦讀書，過唔到嚟，雖然三缺一，啟山話到時會送驚喜畀爸爸。有咁孝順嘅乖仔，相信小霍開工都開得心甜啲，唔知屆時「未來新抱」、國家跳水公主郭晶晶會唔會過埋去呢？
今次冬季奧運會將於下月十二日至廿八日舉行，係加拿大繼一九七六年蒙特利爾夏季奧運會同一九八八年卡加利冬季奧運會後第三次搞嘅奧運會。大會一共設計咗三隻吉祥物，全部都係加拿大傳說中嘅動物，唔知啟山會唔會送晒三隻畀爸爸做禮物呢？