煲呔曾早前被網友踢爆公鏡私用，使用政府新聞處一支長鏡頭到元朗南生圍打雀，當時特首辦辯稱煲呔曾借鏡頭係為咗寫一篇候鳥網誌，宣揚生態保育訊息。事隔十多日，煲呔曾篇補鑊網誌尋日終於出爐，可惜網誌內容夾雜好多廢話，又話當日觀鳥遇到不少志同道合嘅朋友，係朋友就唔會踢爆佢公鏡私用啦！
煲呔曾只用兩三行文字簡單介紹三種雀鳥，其餘大部分都係講自己觀鳥經過和體會，最廢嗰段係話自己在寒風颯颯、風吹雨打嘅野外環境觀鳥，而觀鳥講求嘅專注和耐性，令佢呢個「急性子」有所平衡，同熱烘烘嘅香港政壇一樣，令佢學識克制同忍耐云云。如果識得克制，就唔會成日玩爆肚，仲要爆親肚都講錯嘢喇，難為佢仲敢堂而皇之講呢番話！
煲呔曾又話政府嘅保育政策致力維護本地生物嘅多樣性，使市民可以共享寶貴嘅天然資產，既然係咁，為何身兼觀鳥會成員嘅前天文台台長林超英，日前高調質疑政府容許有人藉發展之名喺塱原濕地建屋呢？如係誤會，政府真係要檢討吓喇！