龍傳基金尋日舉辦傑出華人講座，邀請咗「體操王子」李寧與幾百名八十後年輕人分享人生經驗，以其運動員生涯及退役從商嘅經歷勉勵青年人。談到香港運動員發展，李寧有感而發話，雖然香港體育設施較內地優勝，但全職運動員無錢係個頭痛問題，佢希望政府增撥資源培訓年輕運動員，否則培訓嘅黃金時間一過，有錢都無用！
七歲已開始接受刻苦體操訓練嘅李寧話，運動員嘅天賦無可替代，好似內地嘅「跳水公主」郭晶晶及「欄王」劉翔，佢哋都係從小接受訓練，將潛能充分發揮，所以必須把握年輕嘅黃金時間訓練，否則長大後點樣訓練都好難做出成績；當然，要及早培訓，政府要投放更多資源，運動員將來攞獎可為香港帶來榮耀。
儘管李寧喺體育生涯中經歷多番起跌，但佢仍樂觀、積極面對，領略到「承受失敗後，人生才會學得成熟」。佢仲畀咗個錦囊班後生仔，教佢哋處理人際關係：「你尊重別人，人亦會尊重你；互相包容，就算棘手問題都可以解決。」大家收到喇！