工聯會立法會議員黃國健早前信誓旦旦話嫻姐無意復出，懇求各方唔好再逼佢，但後來傳出建制派決意派強陣參選，將會加大力度游說做過九龍東票后嘅嫻姐強勢復出，點知近日黃國健嘅口風又變得鬆咗，話嫻姐有機會復出、亦有機會唔復出，令人以為今次嫻姐真係「返嚟喇」！

賣樓儲彈藥歎世界？

夾都無咁啱，我哋尋日就喺中環中國會門口，撞到嫻姐同高鐵悍將運輸及房屋局局長鄭汝樺（Eva）食飯，唔通嫻姐咁快做定準備，以便將來重返議會為八十後發聲？嫻姐話今次的確係搵Eva傾公事，講吓沙中線對市民嘅影響，但佢一再強調自己好享受唔做議員後嘅半退休生活。嫻姐仲兩度斬釘截鐵同我哋講一定唔會參選。佢又自爆話：「前後已經有幾十人游說過我參選，好多謝大家咁睇得起我，但係我真係、真係唔想復出喇！大家可以慳番啲口水。」

我哋同嫻姐講完拜拜之後，轉頭就收到嫻姐賣樓嘅消息。層樓位於灣仔永豐街永豪閣高層，由嫻姐同親人共同擁有，喺八八年以七十一萬三千元買入，依家以七百二十八萬元賣出，升值超過十倍，平均呎價高達一萬四千元，呎價足以媲美唔少半山豪宅，估計係發展商收購用作將來將整幢樓重建。

嫻姐早前講過呢間係佢媽媽生前叮囑佢買落嘅「姑婆屋」，不論對方出價幾高都唔會賣。唔知今次行動係代表嫻姐儲定彈藥退休，定係反映呢個世界冇嘢可以講得埋，未到最後一刻乜都可以改變呢？