返到香港嘅蔡冠深，覺得天氣暖笠笠，早前出席慈善步行時只着一件薄風褸。咁抵得冷，全因為喺瀋陽、長春住咗一星期，經歷零下廿幾度的日子。何解咁凍都要出門？原來佢間公司新華集團喺瀋陽扎根廿年，早前搞廿周年慶祝活動，所以冒雪都要帶排行第三嘅公子撐場。

蔡公子彈琴顯身手

瀋陽冬天出名凍，今次下暴雪，蔡冠深都失預算，好彩當地頭住家放咗唔少禦寒衣物，落機後急急着衫繼續出席連串慶祝活動，包括喺東北大學舉行嘅音樂會，佢仲即場捐贈一部三角鋼琴賀集團生日，由擁有八級鋼琴底子嘅蔡公子彈奏一曲，為新鋼琴剪綵。

此行仲拜訪咗新上任嘅遼寧省委書記王珉，蔡冠深話，遼寧已成為港商看重嘅投資區域，佢哋集團近日聯同其他財團喺瀋陽核心位置開發瀋陽新華國際金融中心品牌項目，建五星酒店及寫字樓，投資超過廿億元人民幣。

卓妮