中國人注重飲食文化，要飲得同食得，除咗味覺之外，視覺享受都唔能夠忽視。位於鑽石山嘅南蓮園池，可以話係「大隱隱於市」，園池以唐朝建築作為園內嘅設計，一樹一木都取自天然，置身其中，整個人格外平靜。園內素菜館「龍門樓」嘅新派齋菜同樣造得出色，好多名人無論係咪茹素，都好鍾意光顧，食完齋喺園中行吓，簡直係賞心樂事！鄉議局主席劉皇發尋日正日生日，就同成班孝順子孫一齊去食素積福，早兩日香港潮屬社團總會名譽主席高佩璇都喺龍門樓宴客，畀卓妮撞個正着。
食齋欣賞園景
發叔每年初三都負責幫香港祈福求籤，尋日係佢正日生日，當然要食素為大家積福啦！發叔每年生日都食素，成班仔女陪佢一齊食，今年發叔揀咗嚟龍門樓，筵開四席好熱鬧。佢話今次係第二次嚟，菜式由屋企人打點，好啱佢心水。
喺志蓮淨苑做咗廿幾年義工嘅高佩璇係虔誠佛教徒，雖然唔係食全素，但一個月都會嚟幾次。佢話喺龍門樓邊食齋邊欣賞園中草木，聽埋寧靜嘅古琴音，每次食完都好滿足，早幾日佢喺度宴客，仲特別向卓妮介紹幾款混合意、日嘅fusion菜式添。
龍門樓唔用蛋，但會用奶同芝士，菜式中有唔少呢方面嘅搭配，而且佢哋崇尚自然本相，菜式唔會用味精同製成品。
時令食材入饌
佢哋只會用最時令嘅食材入饌，加上特製嘅醬汁凸顯食材味道。好似龍門樓將近期當造嘅新鮮猴頭菇炆煮三個小時，上桌前再煎封，肉軟而外脆，口感豐富，配搭意大利飯，意大利米剛好吸收汁液，口感好強，層次豐富；再加上以太極造型碟上桌嘅醋汁鮮竹，一邊用腐乳汁，一邊用日本山椒汁，兩種味道對比強烈。
高佩璇推介嘅忌廉松露焗舞茸豆腐同樣出色，道菜用混合咗松露嘅忌廉薄膜覆蓋住細滑嘅豆腐，最底部是有咬口嘅舞茸，一小碗分量有齊三種不同口感，香味令人回味無窮。但食到再飽都要留番個肚食甜品，事關龍門樓嘅甜品多姿多采，好似今次高佩璇就介紹咗用洛神花做嘅果凍，酸酸甜甜，顏色嬌艷，絕無人造色素，食多件都唔怕影響減肥大計！
卓妮